Mögulegt að fella ríkisstjórnina vegna HSS
![hss](https://i1.wp.com/www.sudurnes.net/wp-content/uploads/2017/03/hss.jpg?resize=620%2C264)
Oddný G. Harðardóttir, þingmaður Samfylkingar í Suðurkjördæmi, segir þá þingmenn kjördæmisins sem búa á Suðurnesjum geta fellt ríkisstjórnina verði ekkert að gert í málefnum Heilbrigðisstofnunar Suðurnesja.
Oddný sat aðalfund Öldungaráðs Suðurnesja um helgina, en þar var fjárskortur Heilbrigðisstofnunar Suðurnesja helsta mál á dagskrá. Fram kom á fundinum að ekki sé tekið tillit til mikillar fjölgunar íbúa eða samsetningu þeirra í fjárlagafrumvarpi ríkisstjórnarinnar fyrir næsta ár. Það segir Oddný vera óásættanlegt í pistli á Facebook-síðu sinni.
Þar segir hún einnig að 10 þingmenn Suðurkjördæmis búi á Suðurnesjum og að þar af séu sex stjórnarþingmenn.
“Þau geta fellt ríkisstjórnina ef þeim sýnist svo. Þau verða að leggjast á árarnar með okkur hinum, sveitarstjórnarfólki og íbúum.” Segir Oddný, en pistil hennar má sjá hér fyrir neðan.
Þá hefur töluverð ólga verið á meðal starfsfólks HSS vegna stjórnunarhátta nýs forstjóra stofnunarinnar, sem varð til þess að nokkur fjöldi starfsfólks skrifaði undir vantraustyfirlýsingu á störf forstjórans sem send var heilbrigðisráðuneytinu.