Grindavíkurvegur lokaður að hluta eftir að rúta fór út af veginum
Grindavíkurvegur verður lokaður um óákveðinn tíma frá Nesvegi að Bláalónsvegi og er hjáleið um Bláalónsveg, en rúta fór út af veginum í morgun. Að sögn lögreglu var bílstjórinn einn í rútunni og slapp hann ómeiddur. Mjög bratt er á þeim stað sem rútan rann út af í hálku og þar sem rútan er stór getur tekið allt að klukkustund að ná henni upp á veg, að sögn lögreglu.
Á vef Vegagerðarinnar segir að hálka og éljagangur sé á Reykjanesbraut. Snjóþekja er nokkuð víða á Reykjanesi.