Haukur Helgi Pálsson kynntur til leiks í dag
![haukur helgi](https://i0.wp.com/www.sudurnes.net/wp-content/uploads/2015/10/haukur-helgi.jpg?resize=620%2C264)
Haukur Helgi Pálsson landsliðsmaður í körfuknattleik mun, samkvæmt heimildum Local Suðurnes, skrifa undir samning um að leika með Njarðvíkingum í Dominos-deildinni út tímabilið. Þetta verður tilkynnt á blaðamannafundi sem Njarðvíkingar hafa boðað til síðar í dag.
Samningar á milli aðila munu vera fullfrágengnir en það eina sem gæti mögulega komið í veg fyrir komu Hauks til Njarðvíkur mun vera áhugi erlends liðs á leikmanninum.
Haukur Helgi hefur leikið með Fjölni hér á landi og Manresa á Spáni en hann lék síðast með Mitteldeutscher BC í Þýskalandi. Hann átti einnig í viðræðum við Grindavík og Stjörnuna áður en hann samdi við Njarðvíkinga.