Öllum bankaútibúum á Suðurnesjum lokað
Útibúum Íslandsbanka og Landsbanka á Suðurnesjum, eins og annarsstaðar á landinu hefur verið lokað vegna þeirra tímabundnu erfiðleika sem steðja að vegna útbreiðslu kórónuveirunnar. Landsbankinn skellti í lás í dag en útibú Íslandsbanka verða lokuð frá og með morgundeginum, miðvikudeginum 25. mars, nema í brýnni nauðsyn og eru viðskiptavinir beðnir um að nýta sér stafrænar lausnir fyrir alla helstu bankaþjónustu.
Viðskiptavinir bankanna beggja eru hvattir til að óska aðeins eftir afgreiðslu í útibúi sé erindið mikilvægt og ekki hægt að leysa úr því með öðrum hætti; með stafrænum þjónustuleiðum bankanna, öppum, í netbönkum eða með samtali við Þjónustuver, með tölvupósti eða með því að senda fyrirspurn í gegnum netspjall.