Komufarþegar geta nýtt sér leið 55
Komufarþegum í Leifsstöð er nú heimilt að nýta sér almenningssamgöngur, leið 55 með Strætó, frá flugstöðinni gegn því að sýna vagnstjóra SMS-skilaboð frá sóttvarnayfirvöldum sem staðfesta að viðkomandi sé undanþeginn sóttkví vegna komu til landsins.
Þetta kemur fram í 6. grein reglugerðar um sóttkví og einangrun og sýnatöku við landamæri Íslands vegna Covid-19 þar sem fjallað er um framkvæmd heimasóttkvíar, en greint er frá þessu á vefsvæði Morgunblaðsins.
Breytingin tók gildi í gær en frá því í apríl 2020 hefur öllum komufarþegum verið óheimilt að nota almenningssamgöngur frá Leifsstöð.