Allt seldist upp og tæki biluðu á opnunarhelginni
![20210907_082029](https://i0.wp.com/www.sudurnes.net/wp-content/uploads/2021/09/20210907_082029.jpg?resize=620%2C264)
Hamborgarastaðurinn Smass opnaði á Fitjum í Njarðvík um síðustu helgi og er óhætt að segja að staðurinn hafi fengið góðar móttökur hjá Suðurnesjafólki, en allt sem í boði var seldist upp.
Þetta kemur fram á Facebooksíðu fyrirtækisins þar sem viðskiptavinum er þakkað kærlega fyrir viðtökurnar og bent á að á næstunni verði opnað fyrir pantanir á vef staðarins.
Kærar þakkir fyrir frábærar viðtökur og þolinmæði yfir opnunarhelgina, segir á Facebooksíðunni.
Þetta gekk ekki hnökralaust fyrir sig, einstaka tæki brugðust okkur og birgðir seldust upp enda fór aðsókn fram úr björtustu vonum.
Nú erum við komin með allar græjur á fullt og allar vörur komnar í hús. Við keyrum því vikuna af stað á fullum krafti.
Frá og með á morgundeginum getið þið svo pantað á netinu og sótt á staðinn okkar í Fitjum.
Við erum ákaflega þakklát og hlökkum til komandi tíma, segir jafnframt.