Telur að fjöldi milljarðamæringa muni mæta í Bláa lónið á árinu
![blaa lonid](https://i2.wp.com/www.sudurnes.net/wp-content/uploads/2017/06/blaa-lonid.jpg?resize=620%2C264)
Stofnandi og eigandi ferðaskrifstofunnar Sienna Charles, Jaclyn Sienna India, spáir því að Ísland verði einn helsti viðkomustaður ríka og fræga fólksins árið 2019. India, sem sérhæfir sig í að skipuleggja ferðalög ofurríkra er afar hrifin af hinu nýja fimm stjörnu hóteli Bláa lónsins, The Retreat at Blue Lagoon.
Viðskiptavinir ferðaskrifstofunnar eyða að meðaltali um 60 milljónum króna í hverja ferð sem fyrirtækið skipuleggur og því er eftir miklu að sækjast og óhætt að segja að auglýsingin sé góð fyrir hið nýja hótel Bláa lónsins. Ísland er að sögn India góður staður að heimsækja bæði yfir sumar- og vetrartímann.
„Þar eru frábærar heilsulindir. Landið býður upp á fjölmargar spennandi ferðir fyrir ferðamenn og svo eru hótelin góð.“ Er haft eftir henni í tímaritinu Tatler, sem er hvað mest lesið af þeim sem vilja fylgjast með því allra besta í heiminum í dag.
“Ísland komst á kortið hjá hinum efnuðu eftir að fimm stjörnu hótel Bláa lónsins opnaði.” Segir hún einnig – India mælir með því hóteli sem og þyrluflugi um landið.