Fjölga bílstjórum hjá vefverslun og sótthreinsa innkaupakerrur
Starfsfólki í afgreiðslu netverslunar Nettó hefur verið fjölgað og verið er að skoða leiðir til að fjölga bílstjórum í samstarfi við veffyrirtækið Aha, sem sér um að aka vörunum heim til viðskiptavina.
Mikil aukning hefur orðið á pöntunum í gegnum netverslun fyrirtækisins undanfarið sem að hluta má rekja til Covid 19, en fólki í sóttkví er ráðlagt af Landlæknisembættinu að nota heimsendingarþjónustu sé þess kostur.
Þá reynir starfsfólk Samkaupa, sem rekur Nettó og fleiri verslanir um land allt af fremsta megni að sótthreinsa innkaupakerrur, kassa og önnur svæði í verslunum fyrirtækisins auk þess sem komið hefur verið upp sprittaðstöðu fyrir viðskiptavini, segir í tilkynningu frá fyrirtækinu sem birt hefur verið í fjölmiðlum.