35% aukning á tjaldsvæðinu í Grindavík í sumar

Met aðsókn var á tjaldsvæðinu í Grindavík í sumar, frá miðjum maí og til loka september, bæði hvað varðar gesti og gistinætur. Aukningin á gistinóttum á milli ára er um 35% og aukning gesta um 34%. Alls komu 9120 gestir á tjaldsvæðið í sumar frá maí til september en gistinætur voru 10.449.

Aukning bara í september var um helming. Hagstætt veðurfar og mikil aukning útlendra gesta hér á landi hafði auðvitað mikið að segja, þá var tjaldsvæðið opnað viku fyrr  og opið út september. Jafnframt fer ekki á milli mála að tjaldsvæðið í Grindavík þykir glæsilegt og þjónustan góð og verð sanngjarnt. Tjaldsvæðið er jafnframt aðili að Útilegukortinu. Þetta kemur fram á vef Grindavíkurbæjar.

Aukningin undanfarin ár hefur verið í kringum 20% á ári en sumarið núna var einstaklega gott.

• Gistinætur 2015: 10.449
• Gistinætur 2014: 7.720
• Gestir 2015: 9.120
• Gestir 2014: 6.811