Nýjast á Local Suðurnes

Martin yfirgefur Njarðvík – Breytingar á leikmannahópnum á nýju ári

Körfuknattleiksdeild Njarðvíkur og erlendi leikmaðurinn Wayne Martin hafa lokið samstarfi og gengur Martin til liðs við Jamtland í Svíþjóð.

Þetta kemur fram í tilkynningu sem send var úr Ljónagryfjunni í morgun. Í tilkynningunni segir að Martin hafi skilað stóru hlutverki framan af en með komu Chaz Williams fór hlutverkið minnkandi og í ljósi stöðunnar gaf félagið grænt ljós á að Wayne og hans umboðsmaður myndu kanna markaðinn með stærra hlutverk í huga.

Martin skilaði 14,8 stigum og 7,2 fráköstum auk 1,9 varðra skota á tæpum 25 mínútum að meðaltali í leik. Honum til hróss þá hefur hann tæklað hlutskipti sitt sem sannur atvinnumaður og hans framlag verið gott þó mínútum hafi fækkað. Það var þó samdóma álit allra sem að málum koma að það væri betra fyrir hann að komast í aðstæður þar sem leiktíma yrði ekki hamlað vegna vegabréfs.

Að lokum er leikmanninum þakkað samstarfið og óskað góðs gengis hjá Jamtland í Svíþjóð. Þá kemur fram að ljóst sé að breytingar verði á hópnum hjá Njarðvík á nýju ári sem greint verði frá á næstu dögum.