Milljarða verkefni vegna komu bandaríska hersins hefjast í haust

Nýtt fjárhagsár Bandaríska ríkisins hefst 1. október næstkomandi og má gera ráð fyrir að verkefni á vegum bandaríska hersins á Keflavíkurflugvelli hefjist því formlega eftir þann dag. Þetta kemur fram í svari Utanríkisráðuneytsins við fyrirspurn Suðurnes.net.

Varn­ar­málaráðuneyti Banda­ríkj­anna gerir ráð fyrir að kostnaður við breytingar á flugskýlum á Keflavíkurflugvelli, vegna komu P-8 flugvéla til landsins, muni nema tæplega þremur milljörðum króna. Þar af er gert er ráð fyr­ir að um 650 millj­ón­ir króna fari í að koma upp nauðsyn­legri hreinsiaðstöðu og um 200 millj­ónir í skipu­lags- og hönn­un­ar­vinnu.

Þá kemur fram í svari ráðuneytisins að viðræður á milli aðila séu í undirbúningi og verða þá lagðar línur að verkáætlun og fyrirkomulag varðandi framkvæmdina. Bandaríski herinn hefur sem kunnugt er tekið þátt í loftrýmisgæslu við landið á vegum NATO og hafa allt að 200 hermenn dvalið hér á landi til skemmri tíma á meðan á þeim aðgerðum hefur staðið.