Tjarnarsel opnar á miðvikudag – Smitaður starfsmaður lenti á gjörgæslu
Sjö starfsmenn á leikskólanum Tjarnarseli í Reykjanesbæ eru smitaðir af COVID-19, af þeim var einn starfsmaður lagður inn á gjörgæslu en hefur verið útskrifaður og er núna á batavegi. Leikskólinn opnar á ný þann 1. apríl næstkomandi.
Leikskólanum var lokað í síðustu viku. Fyrsta smit var staðfest föstudaginn 13. mars og var því ákveðið að opna ekki leikskólann á mánudeginum 16. mars.
„Honum er lokað til 30. mars en við tókum ákvörðun í gær, vegna þess að það komu upp þessi smit á heillri viku, að framlengja lokun til 1. apríl . Sem er miðvikudagurinn í næstu viku og hann verður sótthreinsaður hátt og lágt á mánudag,“ segir Helgi Arnarson, sviðsstjóri fræðslusviðs í samtali við Fréttablaðið.