Nýjast á Local Suðurnes

Nokkrir ekið útaf Reykjanesbraut í hálku – Óvenjumikið um slys á gangandi vegfarendum

Talsvert hefur verið um umferðaróhöpp af völdum hálku á undanförnum dögum í umdæmi lögreglunnar á Suðurnesjum. Í gær rákust tvær bifreiðir saman á Norðurljósavegi. Einnig lenti bifreið utan vegar á Reykjanesbraut.

Áður höfðu tvær bifreiðir hafnað á ljósastaurum, önnur á Reykjanesbraut og hin á Njarðarbraut.

Þá var bifreið ekið út af Garðvegi og önnur lenti út af á Reykjanesbraut. Bílvelta varð á Grindavíkurvegi og ökumaður missti stjórn á bifreið sinni á Stapabraut með þeim afleiðingum að hún hafnaði utan vegar og á stóru grjóti sem þar var.

Ekki urðu alvarleg meiðsl á fólki í þessum óhöppum.

Auk þessa hefur verið óvenjumikið um slys á gangandi vegfarendum sem rekja má til hálku. Hafa viðkomandi verið fluttir til aðhlynningar á Heilbrigðisstofnun Suðurnesja.