Hefja beint flug frá Keflavíkurflugvelli til Asíu á næsta ári

Skúli Mogensen, forstjóri WOW air, hefur staðfest að félagið muni hefja flug til Asíu á næsta ári. Þetta kemur fram í viðtali við Skúla í Markaðnum í dag.

„Ég er ekki enn tilbúinn að ljóstra upp um hvaða staði við erum þar að horfa til en þar er um að ræða flug til fjarlægari landa en við höfum fram til þessa verið að fljúga til,“ segir Skúli meðal annars í viðtalinu en meðal þeirra áfangastaða sem gera má ráð fyrir að komi til greina eru Kína og Japan meðal annars.

WOW fær fjórar nýjar Airbus A330neo-vélar afhentar á næsta ári og er flugdrægni þeirra mikil, eða rúmir tólf tímar.