Hafa gefið yfir þúsund skammta af mat – Fólk hvatt til að styrkja björgunarsveitirnar
![TF-LIF landhelgis](https://i1.wp.com/www.sudurnes.net/wp-content/uploads/2015/09/TF-LIF-landhelgis.jpg?resize=620%2C264)
Leitin að Birnu Brjánsdóttur, sem meðal annars fer fram um allt Reykjanesið, er sú umfangsmesta sem björgunarsveitir slysvarnafélagsins Landsbjargar hafa staðið fyrir. Um 570 manns taka þátt í leitinni og eru notaðar tvær þyrlur, 15-20 fjórhjól, 11 leitarhundar, 10 drónar og allur bílakostur björgunarsveitanna, auk fjölmargra einkabíla sem notaðir eru til að ferja leitarfólk á milli staða.
Mikill samhugur er á meðal þjóðarinnar í þessu erfiða máli og hafa fjölmörg fyrirtæki og einstaklingar lagt björgunarsveitunum lið á einn eða annan hátt, Suðurnesjafyrirtækið Skólamatur er eitt þeirra fyrirtækja sem hafa útvegað sveitunum mat, en fyrirtækið hefur athent um eitt þúsund máltíðir í dag.
“Já, við afhentum björgunarsveitum á suðurnesjum og í kópavogi c.a. 1000 skammta af kjötsúpu eða lasagna,” sagði Jón Axelsson, framkvæmdarstjóri í spjalli við Suðurnes.net. “Og við hvetjum aðra til að styðja björgunarsveitirnar, hver á sinn hátt.” Sagði Jón.
Móðir Birnu, Sigurlaug Hreinsdóttir, hefur afþakkað fjársafnanir, en bent fólki á að styrkja frekar björgunarsveitir með fjárstyrkjum.
Þá hafa einstaklingar hvatt olíufélögin til að standa við bakið á björgunarsveitunum með því að gefa eldsneyti á tækjakost sveitanna.