Mikið af áhugaverðum stöðum á Reykjanesi
Ferðamálastofa opnar nýjan kortavef
![kortavefur ferdamalastofa](https://i0.wp.com/www.sudurnes.net/wp-content/uploads/2015/07/kortavefur-ferdamalastofa.jpg?resize=620%2C264)
Ferðamálastofa hefur opnað nýjan vef sem byggist upp á korti sem sýnir áhugaverða staði á landinu auk þess sem stutt lýsing er á vefnum um hvern stað, áhugaverðir staðir á kortinu eru annarsvegar merktir með rauðum hring og eru þá taldir sérlega áhugaverðir og hins vegar með gulum og eru þeir sagðir hafa miðlungs aðdráttarafl.
350 manns áttu þátt í matinu en það var gert í fyrrasumar. Sveitarfélög og hagsmunaaðilar tilnefndu samráðsfulltrúa sem komu að skráningu, mati og yfirferð upplýsinga. Fulltrúar áttu meðal annars að meta aðgengi og aðdráttarafl staðanna og benda á staði sem ekki voru þegar skráðir.
Meðal þeirraa staðað á Reykjanesi sem eru taldir sérlega áhugaverðir eru Bláa lónið, Gunnuhver, Reykjanesviti og Hvalsneskirkja en til staða sem hafa miðlungs aðdráttarafl teljast meðal annars Sandgerðishöfn, Vogastapi og Landnámsdýragarðurinn.
![Víkingaheimar](https://i2.wp.com/www.sudurnes.net/wp-content/uploads/2015/05/Víkingaheimar.jpg?resize=620%2C264)
Víkingaheimar komast ekki á kortið en Landnámsdýragarðurinn sem er á sama stað telst miðlungs áhugaverður
Vefurinn er fyrst og fremst ætlaður til stefnumótunar og skipulagsvinnu innan ferðaþjónustu. Hann er ekki hefðbundinn ferðavefur. Á vefnum segir: „Núverandi viðmót er því aðeins fyrsta útgáfa og er þeim sem vilja koma með ábendingar eða leiðréttingar bent á að hafa samband með því að senda póst á netfangið kortlagning@ferdamalastofa.is.”