Bæjarstjóri sáttur við vegatolla: “Ef þetta verður til þess að flýta tvöföldun”
![Reykjanesbraut-Hringtorg-640x437](https://i2.wp.com/www.sudurnes.net/wp-content/uploads/2015/07/Reykjanesbraut-Hringtorg-640x437.jpg?resize=620%2C264)
Kjartan Már Kjartansson, bæjarstjóri Reykjanesbæjar, telur að sátt myndi skapast um vegatollahugmyndir samgönguráðherra, ef þær yrðu til þess að flýta tvöföldun Reykjanesbrautar. Þetta kemur fram í umfjöllun Vísis um málið í dag.
„Persónulega líst mér ekki illa á þessar hugmyndir. Við höfum ýtt á það að tvöföldun Reykjanesbrautar verði lokið og ef þetta verður til þess að flýta eða hjálpa til við að koma því í höfn þá held ég að það myndi skapast sátt um það,“ segir Kjartan við Vísi.is
Hugmyndir ráðherra ganga út á að innheimt verði gjald af ökumönnum á helstu stofnæðum frá höfuðborgarsvæðinu, þar á meðal Reykjanesbraut. FÍB, Félag bifreiðaeigenda á Íslandi, hefur mótmælt áformum ráðherra harðlega og bent á að vel yfir 40.000 kosningabærra manna hafi skrifað undir mótmæli, á innan við viku, þegar sama hugmynd var upp á borðum árið 2011.
Þá hafa yfir 300 manns tekið þátt í könnun á vef Suðurnes.net, á um einum sólahring, þar sem um 92% eru á móti vegatollum. Taka má þátt í könnuninni hér.