Frysta leiguverð í þrjá mánuði.
![reykjanesb](https://i1.wp.com/www.sudurnes.net/wp-content/uploads/2020/07/reykjanesb.jpg?resize=620%2C264)
Stjórn Brynju leigufélags ses. hefur í ljósi mikillar verðbólgu á þessu ári ákveðið að frysta leiguverð næstu þrjá mánuði. Leigufélagið á fjölda íbúða um allt land, þar á meðal á Suðurnesjum.
Leigan í desember, janúar og febrúar mun þannig haldast óbreytt frá nóvember í ár, en allir leigusamningar félagsins eru bundnir vísitölu neysluverðs til verðtryggingar, segir í tilkynningu.
“Verðbólga og hækkandi vextir setja þrýsting á alla í samfélaginu, en mest þó á þá sem hafa minnst á milli handanna. Brynja vill styðja við bakið á sínu fólki með því að gefa leigjendum sínum verðbólgufrí næstu þrjá mánuðina. Eitt mikilvægasta hagsmunamál Brynju og leigjenda félagsins er að viðhalda lágri verðbólgu og lágum vöxtum,” segir Guðbrandur Sigurðsson, framkvæmdastjóri félagsins, í tilkynningunni.