Nýjast á Local Suðurnes

Óþekktu milljarðamæringarnir kaupa fasteignir á Ásbrú fyrir 5 milljarða króna

Rekstrarhagfræðingarnir og viðskiptafélagarnir Arnar Þórisson og Þórir Kjartansson, eigendur fasteignafélagsins Íslenskar fasteignir ehf., hafa keypt íbúða- og at­vinnu­hús­næði á Ásbrú fyr­ir um 5 millj­arða króna. Kaup­samn­ing­ur þess efn­is var und­ir­ritaður í dag. Þetta kemur fram á vef mbl.is, en Suðurnes.net greindi frá því fyrstur fjölmiðla að þeir Arnar og Þórir skoðuðu möguleika á að kaupa fasteignir á Ásbrú í júní á þessu ári.

Ekki hefur borið mikið á þeim Arnari og Þóri, sem stundum eru kallaðir “Óþekktu milljarðamæringarnir”, þeir hafa þó komið víða við í atvinnulífinu undanfarin ár, en þeir eiga meðal annars elliheimili, hótel, starfsmannaleigu og stóra alþjóðlega ferðaskrifstofu.

Á vef mbl.is kemur fram að eign­irn­ar sem nú voru seld­ar hafi farið í opið sölu­ferli í vor, í frétt Suðurnes.net sem vitnað er í hér fyrir ofan kemur þó fram að viðræður Kadeco og Íslenskra fasteigna hafi staðið yfir mun lengur eða síðan seint á síðasta ári.

Hús­næði það sem Íslenskar fasteignir kaupa nú, er skráð á sam­tals 231 fasta­núm­er eða um 28% af heild­ar­fer­metra­fjölda þess hús­næðis sem Kadeco hef­ur haft um­sýslu með fyr­ir hönd ís­lenska rík­is­ins.