Þjálfarar Fjölnis saka Keflavík/Njarðvík um svindl í undanúrslitum Íslandsmótsins
Þjálfararar B-liðs Fjölnis í 2. flokki karla í knattspyrnu og framkvæmdastjóri Fjölnis hafa birt pistil á heimasíðu félagsins vegna leiks gegn sameiginlegu liði Keflavíkur og Njarðvíkur í undanúrslitum Íslandsmótsins sem fram fór síðasta miðvikudag.
Honum lauk með 6:4 sigri Keflavíkur/Njarðvíkur sem síðan vann KA, 2:1, í úrslitaleik Íslandsmóts B-liðanna í gær.
Pistill þjáfara Fjölnis í heild sinni:
Eins og ljóst er orðið þá þá lentum við í ömurlegu atviki í á miðvikudaginn gegn Keflavík í leik okkar í undanúrslitum í 2 flokki karla í B-liðum. Upphafið er að við heyrum óánægju raddir foreldra leikmanna í Keflavík sem varð til þess að við skoðuðum málið frekar og varð maður í raun reiðari og reiðari. Hversu ósanngjarnt er þetta einnig gagnvart okkar drengjum sem lagt hafa mikið á sig við að komast í þennan leik og falla síðan úr leik á þennan hátt. Okkur finnst að þeir hafi haft rangt fyrir sér með þessu leikmannavali og hagað sér mjög óíþróttamannslega.
En um hvað snýst málið. Keflavík notar tvo leikmenn í B-liðinu sem eingöngu hafa spilað með Njarðvík í 2 deildinni í sumar eða 29 leiki og 20 leiki með A liði Keflavíkur í 2 flokki þar sem þeir byrjuðu ALLA LEIKI !
Þessir leikmenn eiga líka samtals 6 leiki í borgunarbikar og annar þeirra með skráða 2.leiki í Pepsídeildinni árið 2014.
Annar þessara leikmanna var spila sinn fyrsta leik í keppni B liða frá því hann varð gjaldgengur í 2.flokk en hann er að klára sitt annað ár í örðrum flokki. Hinn leikmaðurinn spilaði síðast B leik árið 2013.
Þjálfarar frá öðrum liðum höfðu samband við mig í gær af fyrrabragði og hreinlega áttu ekki til orð, annar þeirra er þjálfari í 2.deildinni og sagði þessa leikmenn hafa verið lykil leikmenn í liði Njarðvíkur í sumar.
Hversu eðlilegt er þetta ?Okkur langar að koma þessu á framfæri þar sem Fjölnir og okkar drengir eru mjög óánægðir með þessa framkomu, B-liða keppni er fyrir leikmenn sem þar hafa spilað í sumar en ekki fyrir byrjunarliðsmenn í A-liðum eða leikmönnum sem spila með meistaraflokksvenslaliðum í 2 deild og eiga einnig marga leiki sem landsliðsmenn í yngri landsliðum.
Dæmi hver fyrir sig !
Virðingarfyllst,
Kári Jónasson, þjálfari 2 flokks karla
Björn Orri Hermannsson, þjálfari 2 flokks karla
Guðmundur L Gunnarsson, framkvæmdastjóri Fjölnis
Ekki náðist í forsvarsmenn knattspyrnudeildar Njarðvíkur né þjálfara liðsins við vinnslu fréttarinnar.