Öll Suðurnesjaliðin nældu sér í stig

Grindavík, Keflavík og Njarðvík unnu öll leiki sína í fimmtu umferð Dominos-deildarinnar í körfuknattleik í gærkvöldi, mis sannfærandi þó. Keflvíkingar tóku Tindastól í kennslustund, Grindvíkingar mörðu ÍR-inga og Njarðvíkingar unnu sannfærandi sigur á Skallagrímsmönnum.

Sigur Njarðvíkinga á Skalla­grími á heimavelli var sannfærandi þrátt fyrir að gest­irn­ir hafi náð að byggja upp smá spennu með því að minnka muninn í þrjú stig þegar skammt var eft­ir, þá settu Njarðvíkingar í fluggírinn og náðu að klára leikinn. Sigurinn var mikilvægur fyrir Njarðvíkinga sem hafa átt erfitt uppdráttar í upphafi tímabilsins.

Stef­an Bonn­eau var stiga­hæst­ur hjá Njarðvík með 30 stig og Björn Kristjáns­son skoraði 20.

Grinda­vík lagði ÍR að velli 81-78 á heimavelli þeirra síðarnefndu í gær. Grindvíkinga voru í ágætis málum í fyrri hálfleik, náðu að byggja upp forskot sem ÍR-ingar söxuðu jafnt og þétt á í síðari hálfleik. ÍR-ingar komust svo yfir þegar nokkrar mínútur lifðu leiks og eft­ir það var leik­ur­inn æsispenn­andi og liðin skipt­ust á að hafa for­ystu. Grinda­vík náði svo þriggja stiga forystu þegar nokkr­ar sek­únd­ur voru eft­ir af leikn­um, sem þeir héldu út leikinn þrátt fyrir öflugar tilraunir ÍR-inga til að jafna.

Lew­is Cl­inch Jr. skoraði 20 stig, tók ​5 frá­köst/ og átti 5 stoðsend­ing­ar, Dag­ur Kár Jóns­son kom vel út í sínum fyrsta leik fyrir Grindavík og skoraði 14 stig.

Öflugur varnarleikur tryggði Keflvíkingum þau stig sem í boði voru í TM-höllinni í gærkvöldi gegn Tindastólsmönnum og má segja að þeir hafi hefnt ófara granna sinna úr Njarðvík, en sigur liðsisns gegn Stólunum var afar sannfærandi, lokatölur leiksins 101-79.

Amin Stevens átti frábæran leik fyrir Keflvíkinga, en hann var stigahæstur með 35 stig, auk þess að taka ​19 frá­köst og gefa ​5 stoðsend­ing­ar, Guðmund­ur Jóns­son kom næstur með 23 stig.