Margrét skoraði 8 mörk fyrir Grindavík – Einu marki frá meti Olgu Færsteh
Margrét Albertsdóttir skoraði 8 mörk fyrir Grindavík í ótrúlegum leik sem fram fór á Grindavíkurvelli á laugardaginn þegar Grindavík tók á móti botnliði 1. deildar kvenna, Hvíta riddaranum. Lokatölur leiksins urðu 21-0 fyrir Grindavík sem gjörsamlega valtaði yfir Hvíta riddarann. Með sigrinum tyllti Grindavík sér aftur í toppsætið við hlið FH, en bæði lið eiga eftir að leika tvo leiki.
Eins og tölurnar gefa til kynna voru yfirburðir Grindavíkur algjörir frá fyrstu mínútu, enda skoruðu þær mark á rúmlega 4 mínútna fresti. Eins og áður sagði skoraði Margrét Albertsdóttir 8 mörk í leiknum og Sashana Campell 5.
Keflvíkingurinn Olga Færseth á þó markametið í 1. deild kvenna en hún skoraði 9 mörk í leik fyrir Keflavík gegn Stokkseyri árið 1991.
Grindvíkinga vantaði líka eitt mark til að jafna markamet – Stærsti sigur í 1. deild kvenna er 22:0 en þær tölur litu dagsins ljós árið 2004 þegar Keflavík burstaði Ægi með þeirri markatölu.