Vilja lækkun hámarkshraða og hraðahindranir

Íbúar við Vesturbraut í Reykjanesbæ hafa lagt fram undirritaða áskorun til sveitarfélagsins um viðbrögð við aksturslagi ökumanna og þungaumferð um Vesturbraut.

Lagðar eru fram tillögur til úrbóta: Komið verði fyrir 2-3 hraðahindrunum í samráði við íbúa. Hámarkshraði verði lækkaður í 30 km/klst. Gangbraut verði gerð milli hringtorgs og blikksmiðju og merktar gangbrautir verði við hringtorg. Þungatakmörkun við 7,5 t og þungaumferð beint um höfnina frá Helguvík.

Þetta kemur fram í fundargerð Umhverfis- og skipulagsráðs, sem þakkar fyrir erindið og tekur undir með íbúum.

Starfsmönnum umhverfissviðs er falið að gera umferðarmælingar og koma með tillögur að úrbótum.