Unnur Brá og Silja Dögg myndu ekki ná kjöri – Þetta eru líklegir þingmenn Suðurkjördæmis!
![alþ kosn](https://i2.wp.com/www.sudurnes.net/wp-content/uploads/2017/10/Untitled-design-39.png?resize=620%2C264)
Unnur Brá Konráðsdóttir, forseti Alþingis, Silja Dögg Gunnarsdóttir, þingmaður Framsóknarflokks og Jóna Sólveig Elínardóttir, þingmaður og varaformaður Viðreisnar, munu að öllum líkindum ekki ná kjöri til áframhaldandi setu á Alþingi, ef marka má nýja þingsætaspá Kjarnans.
Í þingsætaspánni eru reiknaðar líkur fyrir hvern frambjóðenda á öllum listum á því að ná kjöri í Alþingiskosningunum, byggt á fyrirliggjandi gögnum um fylgi stjórnmálaflokka og sögulega útkomu kosninga. Nánar má sjá á hverju útreikningarnir eru byggðir á vefsíðu Kjarnans.
Unnur Brá er í fjórða sæti á lista Sjálfstæðisflokksins í Suðurkjördæmi. Hún náði kjöri í aðeins 13 prósent tilvika í sýndarkosningum þingsætaspárinnar. Silja Dögg, sem skipar annað sæti á lista Framsóknarflokks fyrir komandi kosningar náði kjöri í 19 prósent tilvika í sýndarkosningum og Jóna Sólveig náði kjöri í 28 prósent tilvika í sýndarkosningunum, en það myndi að öllum líkindum ekki duga til þess að ná kjöri.
Sé miðað við nýjustu niðurstöður í sýndarkosningunum myndu eftirfarandi aðilar ná kjöri fyrir Suðurkjördæmi:
Framsóknarflokkur:
Sigurður Ingi Jóhannsson
Sjálfstæðisflokkur:
Páll Magnússon, Ásmundur Friðriksson og Vilhjálmur Árnason
Píratar:
Smári McCarty
Vinstri grænir:
Ari Trausti Guðmundsson og Heiða Guðný Ásgeirsdóttir
Miðflokkurinn:
Birgir Þórarinsson
Samfylking:
Oddný Harðardóttir og Njörður Sigurðsson