Tveimur mönnum bjargað úr sjó við Leiru
Um hálfellefu í kvöld voru björgunarsveitir á Suðurnesjum kallaðar út vegna elds í bát rétt við Leiru. Um var að ræða 12 tonna plastbát með tveimur aðilum um borð, segir í tilkynningu frá Landsbjörgu.
Búið er að ná mönnunum frá borði með þyrlu LHG en menn frá Brunavörnum Suðurnesja ásamt björgunarsveitarfólki fóru á staðinn á björgunarskipinu Hannesi Hafstein og fleiri bátum með dælur til að slökkva eldinn. Um 20 björgunarsveitarmenn tóku þátt í aðgerðinni.
Samkvæmt upplýsingum hjá vaktstjóra hjá Landhelgisgæslunni er ástand mannanna talið gott þrátt fyrir veruna í sjónum.