Þrír fluttir á slysadeild eftir fjögurra bíla árekstur
Fjögurra bíla árekstur varð á einbreiðum kafla Reykjanesbrautar í grennd við álverið í Straumsvík um klukkan hálf átta í morgun og gengur umferð afar hægt um svæðið, sérstaklega í átt til höfuðborgarinnar.
Ekkert er vitað um tildrög slyssins en þrír voru fluttir slasaðir á slysadeild. Ekki er vitað hversu margir voru í bílunum fjórum.
Lögregla vinnur nú að því að hleypa umferð í gegn um einstefnu.
Í tilkynningu frá Vegagerðinni segir að umferð gangi hægt um svæðið til vesturs og er henni því beint um Krýsuvíkurveg, Suðurstrandarveg og Grindavíkurveg.