Staða forstjóra Umhverfisstofnunnar verður auglýst til umsóknar
Umhverfis- og auðlindaráðherra hefur ákveðið að auglýsa stöðu forstjóra Umhverfisstofnunar lausa til umsóknar og hefur Kristínu Lindu Árnadóttur, núverandi forstjóra stofnunarinnar, verið tilkynnt um þetta bréfleiðis. Stofnunin hefur verið harðlega gagnrýnd fyrir skort á aðgerðum gagnvart kísilveri United Silicon í Helguvík undanfarin misseri.
Það er Kjarninn.is sem greinir frá þessu og í umfjöllun miðilsins kemur fram að samkvæmt lögum um réttindi og skyldur opinberra starfsmanna skulu þeir skipaðir tímabundið til fimm ára í senn. Kristín Linda var fyrst skipuð í starfið árið 2008 og því fer öðru ráðningartímabili hennar að ljúka. Umhverfis- og auðlindaráðherra hefur nú ákveðið að auglýsa stöðuna lausa til umsóknar og því þarf sitjandi forstjóri að sækja um hana vilji hún gegna starfinu áfram.