Enn miklar tafir á álagstímum í FLE
Enn er töluvert um tafir á álagstímum í komusal Flugstöðvar Leifs Eiríkssonar. Miklar tafir urðu til að mynda í kringum miðnætti í gærkvöldi þegar margar flugvélar voru að lenda á sama tíma á flugvellinum. Farþegar þurftu að bíða lengi eftir töskunum sínum og misvísandi upplýsingar bárust um á hvaða færibandi töskurnar áttu að vera.
Ástæðan fyrir töfunum er sú að verið er að tengja nýtt farangurskerfi við töskuböndin í komusalnum. Gunnar Sigurðsson, markaðsstjóri Isavia, sagði í samtali við mbl.is að tvö bönd af þremur væru í notkun og geta tafir hlotist af því.
„Það er mjög stór álagspunktur um miðnætti þegar margar vélar lenda á sama tíma. Það er mikið af töskum að koma og ekki eins mikil afkastageta,“ segir Gunnar.