Allur ágóði af leik Keflavíkur og Tindastóls rennur í Minningarsjóð Ölla
![olli - orlygur sturluson](https://i0.wp.com/www.sudurnes.net/wp-content/uploads/2015/08/olli-orlygur-sturluson.jpg?resize=620%2C264)
Keflavíkingar fá Tindastól í heimsókn í úrslitakeppni Domino’s deildar karla í körfubolta í dag, en þetta er þriðji leikur liðanna í átta liða úrslitunum. Staðan er 2-0 fyrir Keflavík og Keflvíkingar komast í undanúrslitin með sigri.
Körfuknattleiksdeild Keflavíkur hefur ákveðið að allur ágóði af leik liðanna renni í Minningarsjóð Ölla.
Minningarsjóður Ölla var stofnaður til minningar um körfuknattleiksmanninn Örlyg Aron Sturluson og styrkir sjóðurinn börn til íþróttaiðkunar sem ekki eiga kost á því vegna bágrar fjárhagsstöðu foreldra eða umsjónarmanna.
„Börn í Keflavík hafa notið góðs af styrkjum úr Minningarsjóð Ölla og fyrir það erum við afar þakklát og viljum þakka fyrir,“ segir í tilkynningu á fésbókarsíðu körfuboltans í Keflavík.
Örlygur Aron lést af slysförum í ársbyrjun árið 2000.