Stórsigur Keflavíkur gegn Gróttu – Sveindís Jane skoraði 6 mörk

Keflavík sótti Gróttu heim á Valhúsavöll á Seltjarnarnesi í 1. deild kvenna í gær, lið Gróttu hefur átt erfitt uppdráttar í sumar og tapað sínum leikjum stórt, en liðið hafði fengið á sig 25 mörk fyrir leikinn í gær. Það var því búist við markaveislu á Seltjarnarnesi og sú varð heldur betur raunin, því áður en yfir lauk höfðu Keflvíkingar skorað 11 mörk gegn einu heimamanna.

Sveindís skoraði sex mörk gegn Gróttu

Sveindís Jane Jónsdóttir gaf tóninn strax á fyrstu mínútu leiksins þegar hún kom Keflavíkurstúlkum í 1-0, Gróttustúlkur jöfnuðu leikinn óvænt á þeirri fimmtu, en eftir það réðu Keflvíkingar lögum og lofum á vellinum og röðuðu mörkunum inn jafnt og þétt. Keflavíkurstúlkur áttu hvorki meira né minna en 40 skot að marki, þar af 28 á rammann. Öruggur 10 marka sigur, 11-1 á Seltjarnarnesi.

Sveindís Jane skoraði sex mörk fyrir Keflavík, Anita Lind skoraði tvö og þær Amber Pennybaker, Una Margrét og Birgitta Hallgrímsdóttir sitt markið hver.

Keflavík er í þriðja sæti 1. deildarinnar með 9 stig eftir 5 leiki.