Kolbrún Júlía í úrvalshóp landsliðsins í hópfimleikum

Kolbrún Júlía Guðfinnsdóttir Newman hefur verið valin í úrvalshóp Fimleikasambands Íslands fyrir Evrópumótið í hópfimleikum sem haldið verður í Kaupmannahöfn haustið 2020.

Þetta er í fyrsta skipti sem landsliðs verkefni í hópfimleikum er sett upp á þennan máta, en aldrei hefur verið byrjað á verkefninu svona tímalega. Markmiðið er að nýta nálægðina sem Ísland býður uppá, leyfa landsliðunum að æfa oftar saman og þannig móta stefnuna skýrar fram að EM2020.

Kolbrún Júlía hefur gert það gott í íþróttinni undanfarin ár, en hún var í blönduðum flokki karla og kvenna sem tryggðu sér sæti í úrslitum Evrópumótsins í hópfimleikum í Slóveníu árið 2016 auk þess sem hún var í liði Gerplu sem fagnaði Íslandsmeistaratitli árið 2017.