Starfsemi United Silicon stöðvuð
Umhverfisstofnun hefur ákveðið að stöðva rekstur United Silicon. Þetta kemur fram í tilkynningu sem stofnunin sendi til fjölmiðla í kvöld.
Umhverfisstofnun tilkynnti United Silicon, bréflega, í síðustu viku að hún áformaði að stöðva starfsemi kísilversins ef annaðhvort afl ljósbogaofns verksmiðjunnar færi niður fyrir 10 MW eða stöðvaðist í klukkustund eða meira, þó eigi síðar en 10. september. Ekki yrði þá heimilt að endurræsa ofninn nema með skriflegri heimild að loknum endurbótum og mati á þeim.
„Stofnunin telur ekki viðunandi að íbúar í nágrenni verksmiðjunnar búi við þau verulegu óþægindi sem rekstur verksmiðjunnar hefur í för með sér.“ Segir meðal annars í tilkynningu stofnunarinnar.
Í ákvörðun Umhverfisstofnunar kemur fram að rekstur kísilversins hafi í för með sér veruleg óþægindi fyrir íbúa í nánasta umhverfi verksmiðjunnar. Einnig hafi borist kvartanir frá starfsmönnum annarra fyrirtækja á iðnaðarsvæðinu.