Skálað í vatni við verklok
![FB_IMG_1706052692893](https://i0.wp.com/www.sudurnes.net/wp-content/uploads/2024/01/FB_IMG_1706052692893.jpg?resize=620%2C264)
HS Veitur hafa unnið að því undanfarið að koma upp varavatnsbóli við Árnarétt í Garði og við verklok var við hæfi að skála í vatni fyrir því að varavatnsból fyrir Reykjanesbæ og Suðurnesjabæ er nú tilbúið.
HS Veitur hafa unnið að því í samvinnu við bæjarstjóra Reykjanesbæjar og Suðurnesjabæjar og stjórnvöld að gera ráðstafanir til þess að koma upp varavatnsbóli við Árnarétt í Garði sem nýst getur þeim 25 þúsund íbúum og fyrirtækjum sem þar eru, segir í tilkynningu.
Varavatnsbólið er nú tilbúið til notkunar og mun nýtast ef á þarf að halda, enda líkur taldar á endurteknum eldgosum á Reykjanesi á næstu árum eða áratugum, með tilheyrandi áhættu á áhrifum á neysluvatnsafhendingu fyrir svæðið.
Á myndinni eru saman komnir við vatnsbólið af þessu tilefni bæjarstjórarnir, þeir Kjartan Már Kjartansson og Magnús Stefánsson ásamt Jóhanni Friðrik Friðrikssyni, stjórnarformanni HS Veitna og Páli Erland, forstjóra HS Veitna.