Munu ekki segja upp starfsfólki við breytingar á rekstri Isavia
Um áramótin verður rekstri Isavia, sem hingað til hefur verið rekinn af einu móðurfélagi, skipt í þrennt með stofnun dótturfélaga um innanlandsflugvallakerfið og flugleiðsöguþjónustu á Norður-Atlantshafi. Móðurfélagið mun áfram sjá um rekstur Keflavíkurflugvallar og stoðdeilda.
Forstjóri Isavia, Sveinbjörn Indriðason segir skipulagsbreytingarnar ekki til þess fallnar að Isavia þurfi, eða ætli að skera niður í starfsmannafjölda eða bæta í hann.
„Það er mjög mikilvægt líka að gæta þess að þarna erum við að fara úr einu félagi í þrjú félög og við þurfum að standa vörð um að það verði ekki til nýr kostnaður eða ný umsvif sem tengjast því,“ segir hann meðal annars í viðtali við mbl.is, þar sem farið er í gegnum breytingarnar sem munu eiga sér stað um áramót.