Leikskólinn Holt tilnefndur til Evrópuverðlauna fyrir lestrarverkefni

Leikskólinn Holt í Reykjanesbæ er tilnefndur til Evrópuverðlauna eTwinning fyrir lestrarverkefni sem leikskólinn hefur tekið þátt í undanfarin ár. Leikskólinn fékk gæðaviðurkenningu menntaáætlunar Evrópusambandsins fyrir sama verkefni á síðasta ári.

Verkefnið er eitt af 13 verkefnum sem tilnefnt er í aldurshópnum 4-11 ára, en alls voru 202 verkefni til skoðunar hjá dómnefnd sem í sitja 35 manns frá jafnmörgum löndum. Samkvæmt frétt á heimasíðu eTwinning verður tilkynnt um verðlaunahafa á næstu vikum.

Á myndinni sem tekin var þegar leikskólinn fékk gæðaviðurkenningu menntaáætlunar Evrópusambandsins eru Sigurbjört Kristjánsdóttir og Anna Sofia fyrir miðju, en þær hafa séð um verkefnið á Holti. Heiða Ingólfsdóttir leikskólastjóri er við hlið þeirra. Fræðslustjórinn í Reykjanesbæ, Helgi Arnarson og leikskólafulltrúinn Kristín Helgadóttir.