Leikmenn Tindastóls borguðu sig inn á leik í Grindavík: “Á landsvísu erum við ein fjölskylda”
![tindast korfub](https://i2.wp.com/www.sudurnes.net/wp-content/uploads/2017/10/tindast-korfub.jpg?resize=620%2C264)
Grindavík og Tindastóll mættust í Domino´s-deild karla í kvöld í körfuknattleik í kvöld og rann aðgangseyrir leiksins sem og aðgangseyrir kvennaleikja Grindavíkur og Þórs frá Akureyri um helgina óskiptur til styrktar fjölskyldu Magnúsar Andra Hjaltasonar sem var bráðkvaddur í vikunni, langt um aldur fram en hann var um árabil formaður körfuknattleiksdeildar Grindavíkur.
Allir leikmenn Tindastóls byrjuðu kvöldið á að greiða sig inn á leikinn og lögðu þannig sitt af mörkum til styrktar fjölskyldu Magnúsar heitins. Tindastólsmenn voru hins vegar ekki eins gestrisnir þegar á völlinn var komið, en liðið vann 88-81 sigur í spennandi og skemmtilegum leik.