Gosstöðvar vinsælar á sunnudagsrúntinum
Á milli 2.200 og 2.300 manns gegnu fram hjá teljurum Ferðamálastofu við gönguleiðir að gosstöðvunum í Geldingadölum í gær og er dagurinn sá fjölmennasti undanfarnar tvær vikur.
Lögreglan á Suðurnesjum bendir á að bannað sé að leggja á og við Suðurstrandarveg. Bílum skal lagt á skipulögðum bílastæðum á grasfleti við veginn, aðkoma er að stæðunum bæði úr austri og vestri.
Veðurspá fyrir gosstöðvarnar og líkleg gasdreifing í dag, mánudag og á þriðjudag er eftirfarandi:
Fremur hæg norðaustlæg eða breytileg átt og bjart að mestu í dag, hiti 4 til 10 stig. Gasmengun er ólíkleg til að berast í miklu magni yfir byggð, en gæti safnast fyrir í lægðum á gosstöðvunum.
Snýst í sunnan 3-8 m/s í kvöld sem gæti blásið gasmengun yfir Vatnsleysuströnd, og seint í kvöld og nótt eru líkur á þoku.
Suðvestan 3-8 og skýjað í fyrramálið og líkur á smáskúrum. Gasmengun berst þá í átt að höfuðborgarsvæðinu, en eftir hádegi á morgun snýst í norðvestan 5-10 og mengunin ætti að berast á haf út.