Nýjast á Local Suðurnes

FöstudagsÁrni er með putta á púlsi pólitíkur

Æi bara bíbí og blaka í föstudagspistlinum þessa vikuna.

Ég hreinlega hallast að því að Justin Bíbí sé á landinu. Ég hef sjaldað séð eins mikið fjölmiðlafár yfir vandræðaungling. Vísir hefur séð til þess að maður hreinlega heldur að samfélagið sé lamað á meðan goðið baðar sig í Bláa lóninu og smástelpurnar í beinni útsendingu skælandi. Ég man ekki eftir svona miklum látum fyrir jólatónleika Björgvins. Þar sem sá gamli rembist við að kreista síðustuleifarnar af raddböndunum upp úr sér með lindað upp á miðjan brjóskassa. Hann þótti að vísu þvílíkt stykki í den þá brutu stlpurnar framtennurnar til að líkjast goðinu,það er allt sem áður var hjá Bjögga greyinu.

arni arna keflavikurn

Það er ekkert grín að vera svín og þurfa að fara í viðtal hjá fréttamanninum Arnari Páli hjá RÚV. Ótrúlegt að fagmaður í fjölmiðlum láti grípa sig fyrir svona aulahúmor. Það er eitt að hugsa en annað að tala. En það er víst komin einföld lausn á offituvanda þjóðarinnar. Kílóin fjúka víst í súludans, miðað við viðtal við Heiðrúnu Finnsdóttur á Smartlandinu. Hún sveiflast á súlunni og kílóin hreinlega skvettast af henni. Nú setjum við í byggingarreglugerð skyldu um súlu á hvert heimili og málið er leyst.

Það er augljóst að kosningar eru í nánd. Loforðin streyma fram, stefnur og áherslur sem er auðvitað af hinu góða. Fyrir mér er þó skrítið að sjá Samfylkinguna lofa eldri borgurum og öryrkjum bætt kjör og öflugra heilbrigðiskerfi – og þetta allt vill Samfylkingin gera hávaðalaust. Þetta er allt gott og blessað, enda má alltaf gera betur í þessum málaflokkum sem öðrum. En það situr samt í mér að Samfylkingin skar niður launakjör eldri borgara og öryrkja þegar síst skyldi, hækkuðu lyfjakostnað upp úr öllu valdi og til að toppa þetta þá fækkaði vinstri stjórnin stöðugildum í heilbrigðiskerfinu um 5öö. Á sama tíma var störfum í umhverfismálum og menningu fjölgað – hvað finnst ykkur um þessa forgangsröðun vinstri stjórnarinnar og þau loforð sem fjúka núna um netheima í von um að skríða í 8% fylgi í næstu skoðunarkönnun.

Ég skil ekki hugsunina með ný stjórnmálaöfl – nýtt á að þýða, í mínum huga eitthvað nýtt og ferskt. En oftar en ekki er sótt í gamla stjórnmálamenn sem hafa lokið sínum vitjunartíma í pólitíkinni. Viðreisn dustar nú rykið af Þorgerði Katrínu, þeirri ágætu konu. En Þorgerður hröklaðist úr pólitík á sínum tíma og allir vita afhverju. Er þetta ferskleiki í boði Viðreisnar?

Karl Garðarsson, þingmaður Framsóknarflokksins leitar að verðlækkunum í verslunum. Ríkisstjórnin hefur lækkað tolla og skattheimtu á vörum til að létta undir með heimilum í landinu, þá hefur krónan styrkst svo að öllu jöfnu ætti þetta að skila sér í buddu neytandans, en gerir það ekki. Fákeppni á markaði og þá helst hve margar verslanir eru á fárra hendi er skýringin að einhverju leyti. Þá er Neytendasamtökin ekki að standa sig. Gott dæmi um hvernig komið er fram við neytendur er að í ágúst sagði mamma upp áskrift sinni á stöð 2, en hún hafði verið áskrifandi frá upphafi. Samt fékk hún reikning fyrir september mánuð. Ég hringdi í 365 til að láta leiðrétta þessi mistök. Mamma er búsett hjá systur minni núna tímabundið og hefur selt og afhent húsið sitt. Nei það er víst í skilmálum að þú þarft að segja upp með mánaðar fyrirvara. Viðskiptavinurinn sem hefur verið áskrifandi í 30 ár þarf að borga auka mánuð sem nýtist henni þar sem systir mín er líka með áskrift. Þarna stelur 365 tæplega 10 þúsund krónum af eldri borgara sem hefur greitt á réttum tíma í 30 ár. Er hægt að segja að vel sé komið fyrir íslenskum neytendum? Við látum koma svona fram við okkur. Kaupmenn hljóta að tapa á framkomu sinni þar sem staðan á pundinu og evrunni fer lækkandi og góð kaup að finna á netinu.

Píratar sem vilja netfrelsi hafa rekið atkvæði í netkosningu til þeirra sem þau greiddu. Þetta er eitthvað allt annað en netfrelsi – ég hef verið stuðningsmaður þess að allar kosningar fari fram í gegnum netið. Það þarf mikinn fjölda við talningar, þvílíkt pappírssóun að gera kjörseðla og úrslitin liggja fyrir um leið. En flokkurinn sem talar fyrir netvæðingu hefur sýnt af sér tilþrif sem líkja má við vinnubrögð einræðisherra af verstu sort.

Ég er að spá í að panta mér mér nýju salernisskálina sem tveir spánverjar kynntu til leiks í vikunni. Skálin er með nema sem veit hvenær maður er búinn að kasta af sér vatni. Þá sprautar skálin sápu á djásnið til að þrífa herlegheitin, og vitið hvað, þá skellur á blástur. Þannig að djásnið fer hreint og þurrt aftur í nærurnar. Þetta er auðvitað tær snilld og loksins getum við karlmenn farið í gegnum daginn fullir öruggi og vellíðan, rétt eins og konurnar með rakadrægu vængbindin. Við eigum eftir að brosa hringinn. Svo er þetta svo þægilegt ef maður dettur óvænt í einnar nætur gaman að þá er kvikindið alltaf limandi hreint og tilí hvað sem er.

Góða helgi