FöstudagsÁrni: Ananas á pizzur og Fjölnir Þorgeirs – Skyldulesning!

Grænmetisbóndi í fýlu, Fjölnir þorgeirs átrúnaðargoðið mitt og borgarstjórinn koma fyrir að þessu sinni ásamt ananas bóndanum á Bessastöðum.

Þegar þvermóðskan hefur komið manni í þrot, hvað er til ráða? Jú líta yfir vitleysuna í sjálfum sér og bæta sig. Þetta er hægt að gera á marga vegu. Stjórnmálamenn eiga það til að riðjast áfram á þvermóðskunni og enda í ógöngum. Þá eru menn stærri og meiri og bara skipta um skoðun og viðurkenna að sín leið var ekki sú rétta. Aðrir viðurkenna ekki neitt, halda fram sínu ágæti ennþá, en vilja taka snúning á málinu með því að blanda þeim sem höfðu á réttu að standa inn í málið. Gott dæmi um það er Dagur B. Eggertsson, borgarstjóri. Hann, ásamt meirihluta Samfylkingar, VG, Bjartar framtíðar og pírata hafa á engan hátt staðið sig í húsnæðismálum í borginni. Í stað þess að Dagur viðurkenni að málaflokkurinn er vanræktur og einungis rándýrar íbúðir í boði í Búseta. Hefur hann lagt til að sveitarfélögin á höfuðborginni snúi bökum saman og myndi sameiginlega stefnu í málinu. Jú hann fékk á baukinn eftir að Ármann bæjarstjóri í Kópavogi tjáði sig um leigufélög og uppbyggingu í Kópavogi. Núna á að stökkva til og nota Kópavog og nærliggjandi bæjarfélög sem björgunarbát. Hvernig væri að bretta upp ermar og fara að gera eitthvað sjálfur?

Eiríkur Rögnvaldsson, prófessor er gapandi hissa og dapur yfir kennsluefni í íslenskri málfræði í framhaldsskólum landsins. Loksins opnar einhver á þessa viðkvæmu umræðu. Getur verið að þetta eigi við á öðrum skólastigum líka? Erum við nægilega móttækileg fyrir breyttri aðferðafræði í kennslu, bættu námsefni í takt við tíðarandann og nýjar rannsóknir. Tala nú ekki um hæfni barna og unglinga og auðvelt aðgengi að ótrúlegum fróðleik á veraldarvefnum. Krakkar geta verið að rekast á nýjar staðreyndir sem gera sumt kennsluefni úrelt. Við verðum að vera á tánum til að halda gildum menntunar í öndvegi og vera óhrædd að taka umræðuna.

Mikið var ég glaður að sjá loksins frétt um átrúnaðargoðið mitt, Fjölnir Þorgeirs. í vikunni. Ég var bara farinn að halda að hann væri gleymdur og tröllum gefinn. Hann hefur bara ekkert verið að bjarga drukknandi hestum eða fólki úr bílflökum lengi. En svo birtist þessi elska í fjölmiðlum og búinn að ná sér í nýja stúlku eina ferðina enn. Það er ekki skrítið að hann doki ekki lengi við, á markaðnum, enda eins og rjúkandi straujárn. En ég hef velt fyrir mér hvort hann eigi sína eigin „Íslendingabók“ með upplýsingum hverja hann er búinn með, fjölskyldutengsl og fleira. Leiðinlegt að lenda í fjölskylduboði með nýju og hún er skyld stúlkunni sem var í sambandi nr. 258. Já eða byrja óvart með dóttur fyrstu kærustunnar. Ég vona að gangi vel hjá kútnum enda er ég einlægur aðdáandi.

Forsetinn okkar er alveg með þetta. Núna er ananas vinsælasta áleggið á pizzum sem sendar eru víð og dreif í hans nafni. Forsetinn er að vísu alfarið á móti ananas á pizzuna sína og ef hann væri einvaldur myndi hann banna slíkan gjörning. Húmor forsetans hefur flogið út fyrir landsteinanna enda góð auglýsing fyrir Ísland að forsetinn væblist um stræti og torg með buff og hati ananas. Það segir allt um hversu friðsælt Ísland er. Á meðan aðrir þjóðhöfðingjar standa í ströngu við boð og bönn, standi í átökum við önnur ríki, þá situr Guðni okkar á Bessastöðum og lætur hugan reika um pizzuát.

Vissir þú að borgarstjórinn í Reykjavík er með 14 PR fulltrúa í vinnu í ráðhúsinu til að fegra gjörðir sínar og senda ljósmyndara á eftir sér. Þessir starfsmenn kosta skattgreiðendur að lágmarki 105 milljónir á ári.Vissir þú að borgarstjóri Reykjavíkur nennir ekki að tala við borgarbúa, felldi niður þann möguleika að panta tíma hjá borgarstjóra og bjó til starfsheitið umboðsmaður borgara í staðinn. Hægt er að búast við að kostnaðurinn sé að lágmarki 7,5 milljónir á ári. Vissir þú að borgarstjóri er með sirka 2 milljónir á mánuði? Kostnaður okkar skattgreiðenda við að hafa Dag B. Eggertsson í embætti borgarstjóra nemur að lágmarki 136,5 milljónum á ári – er hann þess virði?

Bravó Ikea. Það er ljúft að sjá að það er að lágmarki ein verslun sem sýnir neytendum í landinu heiðarleika og þá virðingu sem við eigum skilið að fá. Vegna stöðugleika og styrkingu krónunnar þá hefur Ikea verið að lækka vörur hjá sér síðan í september sem gerir það að verkum að verð í ágústbæklingi Ikea eru röng, þau eru of há. Það hefur bara aldrei gerst áður að skoða bækling mæta á svæðið og varan er ódýrari en þar stóð. Ég fagna gjörðum Ikea og hvet aðra kaupmenn að skila afnámi vörugjalda, tolla og styrkingu krónunnar til baka í vasa neytenda.

Alþingi ætti að setja lög um að allar konur gangi með búrku. Konur hættið að glenna ykkur í búningsklefum, hættið samleiti við karlmenn í kynferðislegum tilgangi nema að gera það fullklæddar. Gæti þetta verið í hugarórum eins þekktasta geðlæknis landsins? Hann vill meina að birting nektarmynda á veraldarvefnum sé konum sjálfum að kenna, ekki gerendans. Góður vinur minn ritaði á facebook „ ég hélt við værum komin lengra.“ Ég hélt það líka, nema að þessi hugsunarháttur geðlæknisins bendi til að hann er ekki stilltur á rauntíma eða einfaldlega að hann þurfi að sækja sér faglegrar hjálpar.

Skemmtilegur grænmetisbóndinn á Flúðum sem þurfti að henda hundruðum kílóa af gulrótum þar sem neytendur keyptu frekar erlendar gulrætur á lægra verði. Bóndinn er hundfúll yfir þessu en datt greinilega ekki í hug að lækka vöruverð til að vera samkeppnishæfur á markaði. Ef það kom ekki til greina hefði ekki mátt gefa mæðrastyrksnefnd eitthvað af þessu?

Góða helgi