Nýjast á Local Suðurnes

Fjórtan skjálftar við Grindavík – Enn greinilegt landris í gangi

Lítil jarðskjálftavirkni hefur verið síðan um miðnætti við Grindavík, en fjórtán skjálftar mældust og voru þeir allir undir 2,0 að stærð. Enn mælist landris vestan við Þorbjörn. Þetta kemur fram á vef Veðurstofunnar, en þar segir jafnframt að með auknu eftirliti berist nú fleiri gögn í hús sem gefa skýrari mynd af þróun mála við Þorbjörn.

Nýjasta GPS úrvinnslan sýnir áframhaldandi landris á svæðinu vestan við Þorbjörn. Í heildina hefur land risið um 3 cm frá 20. janúar. Erfitt er að túlka breytingar útfrá einstaka mælipunktum en með því að skoða meðaltal þéttari mælinga er greinilegt að landrisið er enn í gangi. Þar sem um er að ræða langtíma atburð þarf að fylgjast vel með mælingunum til lengri tíma til að átta sig betur á heildarferli jarðhræringanna. Búast má við áframhaldandi skjálftavirkni á svæðinu og að áfram finnist stærstu skjálftarnir í hrinunni í grennd við Grindavík. Líklegasta skýring þessarar virkni er kvikuinnskot á 3-5 km dýpi rétt vestan við Þorbjörn. Algengast er að kvikuinnskotavirkni ljúki án eldsumbrota.