Fjárreiður Líknarsjóðs Ytri-Njarðvíkurkirkju til skoðunar

Kirkjuráð vinnur nú úttekt, með stuðningi Ríkisendurskoðunar, á fjármálum Njarðvíkurprestakalls, sem þrjár kirkjur heyra undir. Úttektin varðar bílastyrki sem sóknarnefndirnar hafa greitt prestinum árum saman ofan á laun hans, í trássi við starfsreglur um sóknarnefndir, en prestar fá greiddan aksturskostnað úr ríkissjóði. Þetta kemur fram á vef Ríkisútvarpsins, ruv.is

Þá greinir RUV einnig frá því að Kirkjuráð, með fulltingi Ríkisendurskoðunar, hafi einnig til skoðunar fjárreiður Líknarsjóðs Ytri-Njarðvíkurkirkju eftir að Kvenfélag Njarðvíkur kvartaði til Kirkjuráðs eftir að matarkort, sem félagið gaf líknarsjóðnum, virtust ekki skila sér til bágstaddra fyrir jól.

Úttekt Kirkjuráðs og Ríkisendurskoðunar lýtur að 100 matarkortum, upp á 20.000 krónur hvert eða sem samsvarar tveimur milljónum króna, sem kvenfélagið gaf líknarsjóðnum fyrir jólin 2012 og virtust ekki skila sér til bágstaddra fyrir jólahátíðina.