Athugasemdir gerðar við starfshætti allra apóteka í Reykjanesbæ

Athugasemdir voru gerðar við starfshætti allra apótekanna í Reykjanesbæ eftir eftirlitsferðir Neytendastofu um svæðið.
Í fyrstu heimsókn voru gerðar athugasemdir við starfshætti allra fimm apóteka og þeim fyrirmælum beint til þeirra að bæta verðmerkingar. Í kjölfarið var farið í aðra skoðun þar sem í ljós kom að ekki hafði verið nægilega bætt úr verðmerkingum í þremur af fimm apótekum, segir á vef stofnunarinnar.
Í kjölfar seinni skoðunarinnar taldi Neytendastofa tilefni til að sekta rekstraraðila Apótekarans í Keflavík, Reykjanesapóteks og Apóteks Suðurnesja um 50 þúsund krónur.
Var ýmist gerð athugasemd við að ákveðnar vörur væru óverðmerktar eða að verðmerkingar bak við afbreiðsluborð væru ekki nógu sýnilegar.