Nýjast á Local Suðurnes

Fljúga allan ársins hring milli Keflavíkur og Akureyrar

Flugfélag Íslands hefur beint innanlandsflug milli Keflavíkur og Akureyrar í febrúar 2017 í tengslum við millilandaflug í Keflavík.  Flogið verður allan ársins hring milli Keflavíkur og Akureyrar, en auk þess hagræðis sem þetta hefur í för með sér fyrir íbúa á Norðurlandi sem vilja nýta sér millilandaflug, er gert ráð fyrir að þetta verði til þess að fjölga enn frekar ferðamönnum á landsbyggðinni.

 „Við höfum verið að skoða þennan möguleika um nokkurt skeið og það er alveg ljóst að þetta auðveldar ferðamönnum enn frekar að ferðast áfram innanlands. Þá hefur hvatning Norðlendinga haft sitt að segja, enda mun þessi nýja flugleið stytta ferðatímann allverulega þegar farið er í utanlandsferðir,“ segir Árni Gunnarsson, framkvæmdastjóri Flugfélags Íslands.

Flogið verður sex sinnum í viku milli Akureyrar og Keflavíkur yfir vetrartímann og þrisvar sinnum í viku yfir sumartímann.