Ágúst með brons á Evrópumóti unglinga í taekwondo
Ágúst Kristinn Eðvarðsson, fjórtán ára gamall Keflvíkingur, varð um helgina fyrstur Íslendinga til að vinna til verðlauna á Evrópumóti í bardaga í taekwondo en hann keppti á Evrópumóti unglinga í Strasbourg í Frakklandi.
Ágúst komst í undanúrslit þar sem hann lenti í æsispennandi bardaga og var þar hársbreidd frá því að komast í úrslit um gullverðlaunin. Í fréttatilkynningu frá Taekwondo-sambandi Íslands segir að Ágúst Kristinn hafi undanfarin misseri vakið mikla athygli fyrir frábæra tækni og hafi skipað sér í röð efnilegustu keppenda í heiminum í sínum flokki. Þetta kemur fram á mbl.is
Helgi Rafn Guðmundsson þjálfari Ágústs var að vonum ánægður með árangurinn en hann sagði meðal annars á Facebook síðu sinni:
“Frammistaðan hans á mótinu var ótrúleg. Bardaginn (um 3ja sætið) við Spánverjann var t.a.m. einn besti bardagi tæknilega og leikfræðilega sem ég hef séð. Ágúst fékk ekki á sig á mótinu (eitt stig var skráð vegna refsistiga í fyrsta bardaga sem Ágúst fékk fyrir að fara útaf vellinum) og því erfitt að segja að hann hafi tapað neinu.”
Mynd: Keflavik.is