Sóley Sigurjóns GK komin til Siglufjarðar – Eldsupptök enn ókunn
Línuskipið Tómas Þorvaldsson kom í gærkvöldi til Siglufjarðar með togskipið Sóleyju Sigurjóns GK í togi, eftir að eldur kviknaði þar um borð upp úr hádegi í gær. Mikill viðbúnaður var vegna eldsins og sigu reykkafarar meðal annars niður í skipið úr þyrlu Landhelgisgæslunnar og björgunarskip Landsbjargar voru send á vettvang. Engan úr áhöfn skipsins sakaði.
Ekki tókst að koma aðalvél skipsins í gang vegna brunaskemmda, og því var skipið dregið til hafnar. Eldsupptök eru ókunn.