Ölvaður ógnaði öryggisvörðum og flugáhöfn
Lögreglan á Suðurnesjum hafði afskipti af ölvuðum flugfarþega í flugstöð Leifs Eiríkssonar, en hann er sagður hafa verið mjög ógnandi við flugáhöfn og öryggisverði. Var honum að lokum meinað að fara með flugi til Varsjár vegna ástands hans.
Þá kemur fram í tilkynningu frá lögreglu að tveir einstaklingar, sem stöðvaðir voru í flugstöðinni í vikunni, hafi framvísað skilríkjum sem voru í eigu annarra. Þeir voru færðir á lögreglustöð og mál þeirra er komið í hefðbundið ferli.
Það var meira um að vera á flugvellinum, því lenda þurfti farþegaflugvél á vellinum vegna veikinda farþega. Vélin var á leið frá London til Los Angeles þegar veikindanna varð vart. Farþeginn var fluttur á Heilbrigðisstofnun Suðurnesja til skoðunar.