Keflavíkuflugvöllur 111. áfangastaður Wizz Air

Ungverska flugfélagið Wizz Air hóf á föstudag beint flug frá Keflavíkurflugvelli til Gdansk í Póllandi en flogið verður tvisvar í viku, á föstudögum og mánudögum. Vélarnar fara í loftið frá Keflavíkurflugvelli um kvöldmatarleytið og lenda hálf tvö um nótt í Póllandi. Wizz Air er stærsta lággjaldaflugfélag í Mið- og Austur-Evrópu og er Keflavíkurflugvöllur 111. áfangastaður félagsins.

Fjöldi farþega var í fyrsta flugi félagsins og nutu þeir veitinga í boði Keflavíkurflugvallar en að venju var boðið upp á tertu í tilefni dagsins, auk kaffis og gosdrykkja.  Áhöfn vélarinnar klippti á borða er hún gekk um borð líkt og gert er við opnun nýrra flugleiða á Keflavíkurflugvelli.

Flugfélagið Wizz Air er eitt 20 flugfélaga sem bjóða upp á áætlunarflug til og frá Keflavíkurflugvelli í sumar til yfir 70 áfangastaða.