Jackie Chan lenti á Keflavíkurflugvelli – Flottur og í fanta formi
Hasarmyndaleikarinn góðkunni Jackie Chan lenti á Keflavíkurflugvelli á föstudagasmorgun á einkaþotu sinni. Samkvæmt hinum ýmsu fjölmiðlum, innlendum sem erlendum mun kappinn dvelja í nokkra daga hér við tökur á kvikmyndinni Kung Fu Yoga. Tökur munu fara fram í Skaftafelli og uppi á Svínafelli.
Leikarinn var hinn hressasti við komuna til landsins, að sögn starfsmanna á Keflavíkurflugvelli, sem urðu þess heiðurs aðnjótandi að hitta á hann, þá kom fram í máli þeirra sem Suðurnes.net ræddi við að Chan sé í hörku formi, vel á sig kominn og líti alveg einstaklega vel út – “Kallinn lítur helv… vel út, þetta er töffari, það er bara þannig.” Sagði einn af þeim sem hittu á hann. Leikarinn er fæddur þann 7. apríl árið 1954 og verður því 62ja ára eftir um tvo mánuði.
Í myndinni Kung Fu Yoga mun Jackie Chan leika kínverska fornleifafræðinginn Jack sem reynir að finna týndan fjársjóð Magadha-veldisins ásamt indverska prófessornum Ashmita og aðstoðarmanninum Kyra.