Isavia notar arðinn í uppbyggingu á Keflavíkurflugvelli
Ástæða þess að engin arðgreiðsla er greidd út úr Isavia til ríkisins á þessu ári er sú að nýta á fjármunina til að hækka eigið fé félagsins. „Með þessu verður Isavia betur í stakk búið til að mæta frekari fjárfestingum á komandi tímum,“ segir Ingimundur Sigurpálsson, stjórnarformaður Isavia við mbl.is.
Frá 2011 hefur Isavia aukið eigið fé sitt úr 10,9 milljörðum upp í 17 milljarða. „Líkt og mörg önnur fyrirtæki komum við illa út úr bankahruni með miklar erlendar skuldir en við höfum nýtt tækifærið til þess að safna upp góðri eiginfjárstöðu og erum vel í stakk búin til þess að fara af stað með þessar framkvæmdir,“ sagði Guðni Sigurðsson upplýsingafulltrúi Isavia í lok árs 2014, um stöðu framkvæmda á Keflavíkurflugvelli.
Auk framkvæmda í Keflavík sér Isavia um rekstur og viðhald flugvalla um allt land.