Alma innheimtir leigu í Grindavík
Alma leigufélag hefur sent þeim íbúum, sem leigja íbúðir fyrirtækisins í Grindavík innheimtuseðla fyrir leigu janúarmánaðar. Félagið gaf eftir leigu desembermánaðar.
Þetta kemur fram í viðtali mbl.is við Kolbrúnu Jónsdóttur, leigjanda í Grindavík, sem yfirgaf bæinn eins og aðrir þegar hann var rýmdur þann 10. nóvember. Þar með yfirgaf hún jafnframt leiguíbúð sína sem hún leigir af Ölmu leigufélagi, þangað sem hún kveðst ekki geta hugsað sér að snúa aftur „vitandi að allt getur farið af stað hvenær sem er“.
„Þó það sé leyfilegt að vera í Grindavík akkúrat núna, þá veit maður ekkert hvernig það verður næstu vikur,“ segir Kolbrún sem leigir íbúð í Hafnarfirði á meðan óvissuástand ríkir í Grindavík.
Á sama tíma og Kolbrún þakkar fyrir að hafa ekki verið rukkuð fyrir leigu í desembermánuði gagnrýnir hún leigufélagið fyrir að ætla að innheimta leigugreiðslu í janúar.
Kveðst hún hafa sent tölvupóst og spurt hvort reikningurinn yrði ekki felldur niður, en fengið þau svör að það yrði ekki gert að svo stöddu, segir í frétt mbl.is.